आम्हा न लगे 'चार्ज'

अध्यक्षमहोदय, हे काय चाललं आहे याचं? कशाला भांडतायत हे सगळे? हे सगळे थोर आहेत. मोठे आहेत. त्यांचा आदर करतो आम्ही. पण, खरं सांगायचं तर, हे मोठेपण फार त्रासदायक. 'जया अंगी मोठेपण तया यातना कठीण...' असं तुकोबा म्हणून गेलेत ते या सगळ्यांना माहीत असेलच. म्हणून तर यांनी ते मोठेपण सांडावं नि लहान बनून शांततेत राहावं आमच्यासारखं. पण भांडणाऱ्या या लोकांना कसं कळणार ते? याचं भांडण कसलं, तर 'चार्ज'चं. खेळातला कुणी नाही आला मैदानात तर त्यानं टीममधील दुसऱ्या कुणालातरी 'चार्ज' द्यावा, असं काहींचं म्हणणं. असं म्हणालं कुणी तर ऐकणाऱ्यांच्या अंगाचा होतो तीळपापड. मग त्यावरून भांडणं. आता आमचं म्हणणं काय अध्यक्षमहोदय, की, करतायत एवढा आग्रह 'चार्ज' दुसऱ्याला देण्यासाठी तर देऊन टाकायचा ना. आमचंच बघा. आम्ही कधीही स्वतःकडे 'चार्ज' ठेवण्याचा हव्यास धरला नाही. म्हणजे बघा की! कुठल्या शाळा-कॉलेजात जायचं ते जन्मदात्यांनी ठरवलं. अमक्याच कॉलेजात जाणार, असा हट्ट नाही धरला आम्ही. खरं तर हट्ट धरण्याएवढे गुणही नव्हते दहावीला. (अरेच्चा... मधेच हा वाघाच्या डरकाळीसारखा आवाज कुठून आला?) असो. नंतर नोकरीचंही तेच. अमक्याच ठिकाणी नोकरी करीन, असं म्हणून हटून नाही बसलो. जन्मदात्यांनी घेतलेल्या निर्णयानुसार व त्यांच्याच ओळखीनं नोकरीस चिकटलो. चिकटलो म्हणजे, पुलंनी म्हटल्याप्रमाणं, 'पाकिटाला स्ट्यँप चिकटावा तसे चिकटलो'. (मधेच ही मांजर कुठून ओरडली?) असो. ऑफिसातही आम्ही विनाकारण 'चार्ज'चा आग्रह धरून बसत नाही. आमच्या टेबलावरील अर्जंट फाइलचे काम आमच्याकडून वेळेत न झाल्यास कुणीतरी सहकारी येतो किंवा येते नि घाईघाईने ती फाइल घेऊन जातो किंवा जाते. पण आम्ही अशा वेळी खळखळ करीत नाही अध्यक्षमहोदय. चटकन त्या फाइलचा चार्ज देऊन टाकतो. उगाच आपल्यामुळे खोळंबा नको व्हायला हा आमचा सद्हेतू. पण अशा दिवशी आमचे सहकारी दुपारी आम्हाला चहाला का बोलावत नाहीत, हे काही आम्हाला अजून कळलेलं नाही. असो. हे झालं ऑफिसचं. पण आमचे दोनाचे चार करण्याचंही तेच. तिथेही आम्ही आग्रही राहिलो नाही. जन्मदात्यांनी व नात्यातील एका आत्यानं सांगितलेल्या स्थळाशी सोयरीक बांधली. अक्षता पडल्या डोक्यावर. आता संसार अगदी सुखानं चालला आहे. आणि चालणारच ना. तिथेही आम्ही 'चार्ज... चार्ज...' करीत बसत नाही. निर्णय घेण्यासाठी मुळीच आग्रही नसतो आम्ही अध्यक्षमहोदय! इतरांना निर्णय घेण्याची पूर्ण मुभा देतो आम्ही. म्हणजे सकाळी नाष्ट्याला ऑम्लेट करायचं की हाफ फ्राय... चॅनेलपॅकेजमध्ये कुठले चॅनेल असावेत... मुलांनी कॉलेजात कुठली साइड घ्यावी... असे सगळे विषय आम्ही इतरांवर सहज सोपवतो. उगाच 'मीच ठरवीन,' असं म्हणत बसत नाही. मनाचा तेवढा मोठेपणा व प्रगल्भता आहे आमच्याकडे. अरे... हे खुसखुस करून कोण हसतंय? अरे... आवाज वाढला त्यांच्या हसण्याचा. कोण आहे हे? हसणं थांबवा बघू लगेच. हे बरोबर नाही. अध्यक्षमहोदय... थांबवा यांना. अशी हेटाळणी योग्य नाही अध्यक्षमहोदय. अध्यक्षमहोदय ऐकताय ना... अध्यक्षमहोदय...

- चकोर

--