काही मधुमेही साखरेचे प्रमाण कमी होण्यासाठी कारल्याच्या रसाचे अतिप्रमाणात सेवन करतात. त्यांना अपचन, जुलाब यासारखे पोटाचे विकार होण्याची भीती असते.
मधुमेह जडल्यावर अनेकजण गोडाला रामराम करून कडू खाण्यावर भर देतात. रात्री कडू मेथीच्या बिया पाण्यात भिजवून सकाळी रिकाम्या पोटी मेथीच्या बिया चावून खाण्यापासून जांभळाचा रस किंवा सकाळी कारल्याचा रस यांचे नियमित सेवन सुरु करतात. पण त्यांचे अनेकदा अतिसेवन होते. साखरेचे प्रमाण वाढल्याने पेशंट मधुमेहावर उपचार म्हणून गोळ्या घेतात किंवा इन्शुलीन घेत असतात. त्यातच कडू पदार्थांचे सेवन केल्यामुळे रक्तातील साखरेचे प्रमाण अतीकमी होण्याची शक्यता असते. त्याला वैद्यकीय भाषेत hypoglycimiya असे म्हणतात. कडू रसाच्या अतिसेवनात हा धोका होण्याची शक्यता जास्त असते. काही मधुमेही साखरेचे प्रमाण कमी होण्यासाठी कारल्याच्या रसाचे अतिप्रमाणात सेवन करतात. त्यांना अपचन, जुलाब यासारखे पोटाचे विकार होण्याची भीती असते. मराठीतील अती तिथे माती या म्हणीप्रमाणे मधुमेहींनी वरील तिन्ही गोष्टींचा वापर प्रमाणात करावा.
ग्लुकोमीटर प्रमाणित असावा
रक्तातील साखरेचे प्रमाण पाहाण्यासाठी पेशंट ग्लुकोमीटरचा वापर करतात. कारण ग्लुकोमीटर वापरणे अतिशय सुटसुटीत व हे यंत्र कुठेही नेता येते. आपत्कालीन परि‌स्थितीत त्याचा उपयोग करता येतो. तसेच घरच्या घऱी रक्तातील साखरेची नोंद ठेवता येते.ग्लुकोमीटरचा वापर करताना रक्ताचा नमुना हाताच्या बोटाच्या अग्रातून घेतो. त्याला कॅपीलरी ब्लड असे म्हणतात. आपण प्रयोगशाळेत जेव्हा रक्ताची चाचणी करतो तेव्हा रक्त हाताच्या शिरेतून घेतात त्याला व्हीनस सँपल असे म्हणतात.
एकाचवेळेस घेतलेले ग्लुकोमीटरमधील रक्त व प्रयोगशाळेच्या तपासणीत फरक पडतो. तो फरक रक्तातल्या(हिमोटोक्रीट) बदलामुळे असतो. तो जर पंधरा टक्के पुढे मागे असला तर तो स्वीकारण्याजोगा असतो. पण त्यापेक्षा जास्त असला तर तो ग्लुकोमीटर आपल्याला अचूक रिडींग दाखवत नाही असे समजावे. त्यामुळे ग्लोकोमीटर घेताना एक गोष्ट लक्षात घ्यावी की तो सर्वप्रथम iso प्रमाणित आहे अथवा नाही हे जरूर पाहावे. तो तर iso 15917/ 2013 या मार्गदर्शक तत्वाप्रमाणे असेल व प्रमाणित असेल तरच तो घ्यावा. त्यामुळे रिडिंग अचूक येईल. मधुमेह वाढल्याचे चाचणीत दिसून आले तर इन्शुलीन घेण्याचा सल्ला दिला जातो. त्यामुळे लेखाच्या पुढील भागात आपण इन्शुलीनची माहिती घेऊया.
मोबाइल अॅप डाउनलोड करा आणि राहा अपडेट